អ្នកសង្កេតការណ៍បោះឆ្នោតពី ICAPP និង CAPDI
RFI/Im Rachna
ក្រុមអ្នកសង្កេតការណ៍អន្ដរជាតិ មកពី គណៈកម្មាធិការអចិន្ដ្រៃយ៍របស់សន្និសីទអន្ដរជាតិនៃគណបក្សនយោបាយនៅ អាស៊ី ហៅកាត់ថា ICAPP និង អង្គការអ្នកប្រជាធិបតេយ្យអាស៊ីប៉ាស៊ីហ្វិក និយមកណ្ដាលអន្ដរជាតិ ហៅកាត់ថា CAPDI បានចេញសេចក្ដីថ្លែងការណ៍រួមគ្នាមួយ ឲ្យតម្លៃលទ្ធផលបោះឆ្នោតនៅកម្ពុជាថា ជាជ័យជំនះរបស់ទាំងអស់គ្នា។
គណៈប្រតិភូ នៃគណៈកម្មាធិការអចិន្ដ្រៃយ៍របស់សន្និសីទអន្ដរជាតិនៃគណបក្សនយោបាយ នៅអាស៊ី ហៅកាត់ថា ICAPP និង អង្គការអ្នកប្រជាធិបតេយ្យអាស៊ីប៉ាស៊ីហ្វិក និយមកណ្ដាលអន្ដរជាតិ ហៅកាត់ថា CAPDI ដែលត្រូវបាន គជប អញ្ជើញឲ្យមកសង្កេតការណ៍បោះឆ្នោតនៅកម្ពុជា បានចេញសេចក្ដីថ្លែងការណ៍រួមមួយអំពីការបោះឆ្នោតនៅកម្ពុជា ថាប្រព្រឹត្តទៅដោយសេរី យុត្តិធម៌ តម្លាភាព និងសន្តិភាព។ ICAPP និង CAPDI បញ្ជាក់នៅក្នុងសេចក្ដីថ្លែងការណ៍របស់ខ្លួនទៀតថា ការបោះឆ្នោតនេះ បានសរបញ្ជាក់ឲ្យឃើញពីលទ្ធិប្រជាធិបតេយ្យនៅកម្ពុជាដែលមានភាពចាស់ ទុំជាងមុនច្រើន។
ចំពោះលទ្ធផលនៃការបោះឆ្នោត ទោះជាបែបណាក៏ដោយ ICAPP និង CAPDI ថ្លែងថា វាគឺជាជ័យជំនះនៃឆន្ទះភាគច្រើនផ្អែកលើសន្លឹកឆ្នោត។ វាគឺជាជ័យជំនះរបស់ទាំងអស់គ្នា។ ជាជ័យជំនះរបស់គណបក្សប្រជាជនកម្ពុជា ជាជ័យជំនះរបស់គណបក្សសង្គ្រោះជាតិ និងជាជ័យជំនះរបស់ប្រជាពលរដ្ឋកម្ពុជាគ្រប់រូប។ ហើយជ័យជំនះនេះ បានបង្ហាញឲ្យឃើញយ៉ាងច្បាស់ថា លទ្ធិប្រជាធិបតេយ្យ គឺជាវាសនារបស់ប្រទេសកម្ពុជា។
ជាមួយគ្នានោះ ICAPP និង CAPDI ក៏បានស្វាគមន៍ចំពោះសេចក្ដីថ្លែងការណ៍របស់លោក សម រង្ស៊ី ប្រធានគណបក្សសង្គ្រោះជាតិ ដែលបានអំពាវនាវដល់អ្នកគាំទ្ររបស់ខ្លួនទាំងអស់ ឲ្យរក្សាភាពស្ងប់ស្ងៀម និងរង់ចាំទទួលលទ្ធផលផ្លូវការពី គជប។ ICAPP និង CAPDI មើលឃើញថា សេចក្ដីថ្លែងការណ៍របស់ប្រធានគណបក្សសង្គ្រោះជាតិនេះ ជាតម្រូវការចាំបាច់បំផុតមួយ នៅក្នុងស្ថានភាពបច្ចុប្បន្ន។
ស្ថាប័នទាំងពីរខាងលើ តំណាងឲ្យគណបក្សនយោបាយជាង៣៤០នៅអាស៊ី អង្គការសង្គមស៊ីវិល ព្រមទាំងថ្នាក់ដឹកនាំ និងអតីតថ្នាក់ដឹកនាំកំពូលៗនៅតាមបណ្ដាប្រទេសនានា ជុំវិញពិភពលោក ក៏បានជំរុញឲ្យគណបក្សនយោបាយជាប់ឆ្នោតនៅកម្ពុជា ចាប់ដៃគ្នាកសាងឯកភាពជាតិខ្មែរ។ ឯកភាពជាតិខ្មែរដែល ICAPP និង CAPDI អះអាងថា ជាគោលនយោបាយឈ្នះ-ឈ្នះ សម្រាប់ទាំងអស់គ្នា។ សម្រាប់គណបក្សប្រជាជនដែលឈ្នះបានសំឡេងឆ្នោតច្រើន សម្រាប់គណបក្សសង្គ្រោះជាតិដែលឈ្នះបានសំឡេងឆ្នោតទ្វេដង និងសម្រាប់កម្ពុជា ដែលកំពុងតែឈានទៅរកកម្រិតលទ្ធិប្រជាធិបតេយ្យចាស់ទុំជាងមុន ច្រើនថែមទៀត៕
0 comments:
Post a Comment