ដោយ ម៉ាត់ ក្រីយ៉ា
2013-07-31
RFA2013-07-31
ស្ដាប់ ឬ ទាញយកសំឡេង 
ក្រុមយុវជនរបស់គណបក្សប្រជាជនកម្ពុជា ក្នុងថ្ងៃឃោសនារកសំឡេងឆ្នោតជ្រើសតាំងតំណាងរាស្ត្រនីតិកាលទី៥ នាមជ្ឈមណ្ឌលកោះពេជ្រ កាលពីថ្ងៃទី២៧ ខែកក្កដា ឆ្នាំ២០១៣។
RFA/Tin Zakariya
ក្រុមយុវជនដែលឈរជាបេក្ខជនតំណាងរាស្ត្រទាំងនោះ ត្រូវបានគេរៀបចំឲ្យឈរឈ្មោះជាបេក្ខជនពេញសិទ្ធិមួយចំនួន ហើយមួយចំនួនទៀតជាបេក្ខជនបម្រុង។
តាមលទ្ធផលនៃការបោះឆ្នោតបណ្ដោះអាសន្នដែល គ.ជ.ប បានចេញផ្សាយនៅល្ងាចថ្ងៃបោះឆ្នោតនោះ គេសង្កេតឃើញកូនមន្ត្រីជាន់ខ្ពស់ក្នុងជួររដ្ឋាភិបាល ដែលបានឈរឈ្មោះជាបេក្ខជនតំណាងរាស្ត្រទាំងអស់នៅតាមមណ្ឌលបោះឆ្នោត មួយចំនួន មិនបានទទួលអាសនៈដើម្បីចូលរួមក្នុងរដ្ឋសភាទេ។ រីឯ លោក ហ៊ុន សែន ដែលបានរៀបចំទុកដាក់កូនរបស់គាត់ គឺលោក ហ៊ុន ម៉ានី ធ្វើជាបេក្ខជនតំណាងរាស្ត្រនៅខេត្តកំពង់ស្ពឺ នៅលេខរៀងទី៤ នោះ គឺលោករំពឹងថា កូនរបស់លោកអាចនឹងទទួលអាសនៈក្រោយការបោះឆ្នោតនីតិកាលទី៥ ប៉ុន្តែ លទ្ធផលនៃការបោះឆ្នោតបានចេញមកផ្ទុយពីការគិតរបស់គាត់ទៅវិញ។
ទន្ទឹមនឹងនោះ លោក ស សុខា វ័យ ៣៤ឆ្នាំ ស្នងការរងប៉ូលិសក្រុងភ្នំពេញ ជាកូនប្រុសរបស់លោកឧបនាយករដ្ឋមន្ត្រី ស ខេង ដែលបានឈរឈ្មោះជាបេក្ខជនតំណាងរាស្ត្រលេខរៀងទី៦ ប្រចាំខេត្តព្រៃវែង ក៏មិនបានឈ្នះអាសនៈក្នុងខេត្តនោះដែរ។
អាសនៈសរុបនៅក្នុងខេត្តព្រៃវែង ដែលលោកបានឈរឈ្មោះនោះ មានចំនួន ១១អាសនៈ ប៉ុន្តែគណបក្សប្រឆាំងដណ្ដើមបាន ៦អាសនៈ ហើយសម្រាប់គណបក្សប្រជាជនកម្ពុជា ទទួលបានត្រឹមតែ ៥អាសនៈប៉ុណ្ណោះ ហើយ លោក ស សុខា ដែលជាបេក្ខជនតំណាងរាស្ត្រប្រចាំខេត្តព្រៃវែង មកពីគណបក្សប្រជាជនកម្ពុជា លេខរៀងទី៦ មិនត្រូវបានទទួលអាសនៈដើម្បីចូលរួមក្នុងរដ្ឋសភានោះទេ។
ប៉ុន្តែ ទោះជាយ៉ាងណាក្តី តាមការអះអាងពីមន្ត្រីជាន់ខ្ពស់របស់គណបក្សប្រជាជនកម្ពុជា ថា លោក ហ៊ុន ម៉ានី នៅតែអាចទទួលបានកៅអីនៅក្នុងរដ្ឋសភា បើសិនជាបេក្ខជនតំណាងរាស្ត្រលំដាប់ទី១ ប្រចាំខេត្តកំពង់ស្ពឺ គឺលោក សាយ ឈុំ លាលែងពីតំណែង ដើម្បីទទួលតំណែងនៅព្រឹទ្ធសភានោះ។ ចំណែក លោក ស សុខា និងយុវជនដទៃទៀត គឺរង់ចាំការសម្រេចបន្ទាប់ពីកិច្ចប្រជុំដែលនឹងធ្វើឡើងនៅពេល ក្រោយ។
អ្នកវិភាគសង្គមឯករាជ្យ លោក កែម ឡី បានអះអាងថា ការបញ្ចូលបេក្ខភាពតំណាងរាស្ត្រថ្មីជាយុវជន គឺជារឿងសមហេតុផល ប៉ុន្តែការជ្រើសរើសតាមរបៀបគ្រួសារនិយមសែស្រឡាយអាចធ្វើឲ្យ ប៉ះពាល់ដល់សង្គម និងធ្វើឲ្យអ្នកមានសមត្ថភាពមួយចំនួនមិនមានឱកាសដើម្បីជួយបម្រើ សង្គមតាមឆន្ទៈរបស់ពួកគាត់នោះទេ។ លោកបន្តថា យុវជនដែលបានឈរឈ្មោះជាបេក្ខជនតំណាងរាស្ត្រ ហើយមិនបានឈ្នះអាសនៈនៅតាមមណ្ឌលបោះឆ្នោតរបស់ខ្លួន មិនមែនមានន័យថា ពួកគាត់មិនអាចមានតំណែងអ្វីនៅក្នុងរដ្ឋាភិបាលនោះទេ ពួកគាត់ទាំងនោះអាចមកជំនួសកន្លែងអ្នកតំណាងរាស្ត្រមួយចំនួនទៀត ដែលមានតួនាទីដាច់ដោយឡែកនៅក្នុងរដ្ឋាភិបាល។
លោក កែម ឡី៖ «នៅក្នុងសភា ត្បិតតែថាគាត់នៅលេខរៀងក្រោយៗមិនជាប់ជាតំណាងរាស្ត្រមែន ប៉ុន្តែនៅពេលដែលបង្កើតរដ្ឋាភិបាល ក្រុមតំណាងរាស្ត្រលេខរៀងទីមួយ ទីពីរ ច្រើនតែមកក្នុងរដ្ឋាភិបាល ហើយអ្នកដែលឈរនៅលេខរៀងបន្ទាប់ៗហ្នឹង ត្រូវឡើងមកសភាហើយ ហើយខ្ញុំគិតថា កូនឯកឧត្តម សាយ ឈុំ កូនលោក សុខ អាន និងកូនសម្ដេចនាយករដ្ឋមន្ត្រី សុទ្ធតែបានក្នុងនាមជាអ្នកតំណាងរាស្ត្រហើយ ហើយអ្នកដែលនៅលើៗជួរទីមួយ ទីពីរ ត្រូវមកខាងរដ្ឋាភិបាល»។
ក្នុងជួររដ្ឋាភិបាល អ្នកដែលមានតួនាទីធំៗភាគច្រើន គឺជាមនុស្សដែលមានវ័យចំណាស់ ហើយគេនៅមិនទាន់ឃើញមានយុវជនជំនាន់ក្រោយដែលមានចំណេះដឹង ខ្ពង់ខ្ពស់កាន់តំណែងធំដុំណាមួយនៅក្នុងរដ្ឋាភិបាលនោះទេ។ កត្តានេះ នាំឲ្យយុវជនដែលមានសមត្ថភាព មិនមានឱកាសដើម្បីចូលធ្វើការក្នុងការដឹកនាំប្រទេសនាពេលអនាគត នោះដែរ៕
0 comments:
Post a Comment