RFI
គ្រាប់ កាំភ្លើងM-79 ដែលត្រូវបានរកឃើញនៅផ្ទះរបស់ប្រជាពលរដ្ឋមួយកន្លែងក្នុងខណ្ឌ ទួលគោក កាលពីព្រឹកថ្ងៃព្រហស្បត្តិ៍ទី ៨ សីហា។
Siv Channa/RFI
គ្រាប់កាំភ្លើង ប្រភេទ M 79 ចំនួន២គ្រាប់ ត្រូវបានប្រជាពលរដ្ឋក្នុងសង្កាត់ផ្សារដេប៉ូ១ ប្រទះឃើញ នៅមុខផ្ទះរបស់ខ្លួន នៅព្រឹកមិញនេះ។ សមត្ថកិច្ចបានយកគ្រាប់កាំភ្លើងដែលនៅមានប្រសិទ្ធភាពនេះ ទៅរក្សាទុកហើយ។ នេះករណីទី២ហើយ នៅក្រោយថ្ងៃបោះឆ្នោត ដែលទាក់ទងនឹងការបំផ្លោងចោលគ្រាប់ផ្ទុះ បន្ទាប់ពីមានករណីផ្ទុះគ្រាប់កែច្នៃមួយ នៅក្បែរសាលាដំបូងរាជធានីភ្នំពេញ។ ប៉ូលីសនៅមិនទាន់រកឃើញជនបង្ក ដែលបានដាក់គ្រាប់ផ្ទុះទាំងនោះនៅឡើយទេ។
បច្ចុប្បន្នគ្រាប់កាំភ្លើង២គ្រាប់ខាងលើដែលមានសមត្ថភាពអាចផ្ទុះ បង្កគ្រោះថ្នាក់បាននោះ ត្រូវបានសមត្ថកិច្ចប្រមូលយកប្រគល់ឲ្យមន្ត្រីស៊ីម៉ាក់រក្សាទុក ខណៈដែលសមត្ថកិច្ចចំរុះមានមន្ត្រីនគរបាល មន្ត្រីកងរាជអាវុធហត្ថ និងកំលាំងជំនាញពាក់ព័ន្ធមួយចំនួនទៀត ផ្តើមសហការគ្នាដើម្បីស៊ើបអង្កេតទៅលើករណី ស្របពេលដែលករណីផ្ទុះគ្រាប់បែកមួយគ្រាប់នៅក្បែររបងតុលាការរាជធានី ភ្នំពេញកាលពីរាត្រីថ្ងៃពុធ សមត្ថកិច្ចនៅមិនទាន់កំណត់អត្តសញ្ញាណជនបង្កបាននៅឡើយនោះ។
លោក ហួត ចាន់យ៉ារ៉ាន់ អធិការនគរបាលខណ្ឌទួលគោកបានប្រាប់វិទ្យុបារាំងនៅព្រឹកថ្ងៃព្រហ ស្បត្តិ៍នេះថា វាជាគ្រាប់កាំភ្លើងប្រភេទ M-79 ចំនួន ២គ្រាប់ ដែលត្រូវបានជនមិនស្គាល់មុខយកទៅប្លុងចោលនៅជាប់ទ្វាររបងផ្ទះរបស់ ប្រជាពលរដ្ឋម្នាក់ ប៉ុន្តែវាមិនបានផ្ទុះ និងបង្កគ្រោះថ្នាក់ដល់មនុស្សណាម្នាក់ទេ តែវាបានបង្កការភ្ញាក់ផ្អើលដល់ប្រជាពលរដ្ឋបន្តិចបន្តួចប៉ុណ្ណោះ។ បែបណាលោកបញ្ជាក់ថា នៅមិនអាចសន្និដ្ឋានបាននៅឡើយទេថាជាករណីអ្វីនោះ ប៉ុន្តែលោកបានដាក់ការសង្ស័យថា អាចជាករណីបង្កឡើងដោយគំនុំច្រើនជាង ដោយលោកបន្ថែមថា សមត្ថកិច្ចកំពុងស៊ើបអង្កេតលម្អិតលើករណីនេះ។
ដោយឡែកលោក ខេង ទីតូ មន្ត្រីនាំពាក្យកងរាជអាវុធហត្ថលើផ្ទៃប្រទេសបានថ្លែងថា ការរកឃើញគ្រាប់មិនទាន់ផ្ទុះជាបន្តបន្ទាប់នៅពេលនេះ អាចជាការចង់បង្កភាពចលាចលណាមួយដល់ប្រជាពលរដ្ឋនៅក្នុងសង្គម ប៉ុន្តែយ៉ាងណាក៏ដោយ សមត្ថកិច្ចនឹងប្រឹងប្រែងស្រាវជ្រាវស៊ើបអង្កេតស្វែងរកចាប់ខ្លួន ជនបង្ក។ លោកបញ្ជាក់ថា សមត្ថកិច្ចកំពុងបន្តស្រាវជ្រាវស៊ើបអង្កេតទៅលើករណីផ្ទុះគ្រាប់បែក ច្នៃមួយគ្រាប់ នៅក្បែររបងតុលាការរាជធានីភ្នំពេញយ៉ាងសកម្មផងដែរនៅពេលនេះ តែនៅមិនទាន់មានតម្រុយណាមួយនៅឡើយទេ។ ប៉ុន្តែលោកបានអំពាវនាវដល់ប្រជាពលរដ្ឋឲ្យមានភាពស្ងប់ស្ងាត់ និងកុំឲ្យមានការភ័យខ្លាច។
លោក ចាន់ សូវ៉េត មន្ត្រីស៊ើបអង្កេតអង្គការអាដហុកបានថ្លែងថា បើទោះបីជាការផ្ទុះគ្រាប់បែក និងការរកឃើញគ្រាប់មិនទាន់ផ្ទុះ វាជាករណីអ្វីក៏ដោយចុះ លោកស្នើដល់សមត្ថកិច្ចគួរស្រាវជ្រាវរកឲ្យឃើញច្បាស់លាស់ទៅលើករណី ទាំងអស់នេះ ដើម្បីកុំឲ្យប្រជាពលរដ្ឋមានការភិតភ័យ ខណៈដែលមានពាក្យចចាមអារាមពីភាពអសន្តិសុខនានាកើតមាននៅក្នុងប្រទេស នៅក្រោយការបោះឆោ្នតនេះ។
បើតាមលោកចាន់ សូវ៉េត ការស្រាវជ្រាវរកឲ្យឃើញករណីបង្កហេតុដល់សន្តិសុខសង្គមខាងលើ វាជាការសំខាន់សម្រាប់សមត្ថកិច្ចដើម្បីធានាភាពជឿជាក់ដល់ សមត្ថកិច្ច និងការផ្តល់ទំនុកចិត្តដល់ប្រជាពលរដ្ឋ។
0 comments:
Post a Comment