សុក្រ 23 សីហា 2013
RFI
ជំនួយរបស់ចិនដល់វិស័យយោធាកម្ពុជា
Siv Channa/RFI
រដ្ឋមន្ត្រីការបរទេសចិន លោក វ៉ាង យី បានចាកចេញពីកម្ពុជាវិញហើយបន្ទាប់ពីបានបំពេញទស្សនកិច្ច រយៈពេលពីរថ្ងៃ។ តាមរយៈទស្សនកិច្ចនេះ ទីក្រុងប៉េកាំងបានចេញមុខគាំទ្រយ៉ាងពេញទំហឹងដល់រដ្ឋាភិបាលលោក នាយករដ្ឋមន្ត្រី ហ៊ុន សែន ក្នុងនាមជាគណបក្សឈ្នះឆ្នោត ខណៈដែលប្រទេសមហាអំណាចមួយចំនួនទៀតដូចជាសហរដ្ឋអាមេរិក និងសហភាពអឺរ៉ុបជាដើមនៅបន្តតាមដានការវិវឌ្ឍស្ថានការណ៍នយោបាយ កម្ពុជានៅឡើយ។ ដូច្នេះ ជម្លោះនយោបាយនៅកម្ពុជានាពេលនេះកំពុងស្ថិតក្រោមក្រសែភ្នែករបស់ មហាអំណាចដែលអ្នកនយោបាយខ្មែរគួរប្រុងប្រយ័ត្នក្នុងការប្រកាន់ ជំហរនយោបាយរបស់ខ្លួន។
ទំនាក់ទំនងចាក់ទឹកមិនលិចរវាងទីក្រុងប៉េកាំងនិងភ្នំពេញមិន មែនជារឿងថ្មីថ្មោងទេ។ ប៉ុន្តែ អ្វីដែលគួរឲ្យចាប់អារម្មណ៍នៅពេលនេះគឺដំណើរទស្សនកិច្ចរបស់ រដ្ឋមន្ត្រីការបរទេសចិននៅកម្ពុជាបានកើតឡើងចំពេលដែលកម្ពុជា កំពុងមានភាពតានតឹងនយោបាយក្រោយការបោះឆ្នោត។បើទោះបីជាការគ្រោងទុកឬជារឿងចៃដន្យក៏ដោយចុះ ក៏មហាយក្សចិនបានប្រើប្រាស់ពេលវេលានេះដើម្បីបង្ហាញនយោបាយ ការទូតរបស់ខ្លួនសម្រាប់កម្ពុជារួចទៅហើយ។ លោក វ៉ាង យី រដ្ឋមន្ត្រីការបរទេសចិនបានប្រកាសជាឧឡារឹកគាំទ្រគណបក្សប្រជាជន កម្ពុជាក្នុងឋានៈជាគណបក្ស«ឈ្នះឆ្នោតភាគច្រើន»នៅក្នុងរដ្ឋសភា។ ប្រមុខការទូតក្រុងប៉េកាំងថែមទាំងបានសន្យាការពារផលប្រយោជន៍ កម្ពុជាថែមទៀតផង។
នេះជាសារការទូតដ៏មានទម្ងន់មួយដែលមហាយក្សចិនបានផ្ញើទៅកាន់ រដ្ឋាភិបាលរបស់លោកនាយករដ្ឋមន្ត្រី ហ៊ុន សែន ផងនិងដល់សហគមន៍អន្តរជាតិផង។ សម្រាប់កម្ពុជា សារនេះមានន័យជាការផ្តល់កម្លាំងចិត្តដល់រដ្ឋាភិបាលគណបក្សប្រជាជន នៅខណៈដែលបក្សប្រឆាំងកំពុងតែតវ៉ាជំទាស់យ៉ាងខ្លាំងទៅនឹងលទ្ធផល នៃការបោះឆ្នោត។ សម្រាប់នយោបាយអន្តរជាតិវិញ សារការទូតរបស់ចិននៅពេលនេះក៏ត្រូវគេមើលឃើញថា ជាការព្រមានទុកជាមុនដល់បស្ចឹមលោកថា ពួកគេមិនត្រូវមើលរំលងតួនាទីរបស់ចិននៅក្នុងជម្លោះនយោបាយនៅ កម្ពុជានោះឡើយ។
ជាការពិតណាស់ កម្ពុជាក្រោមការដឹកនាំរបស់រដ្ឋាភិបាលគណបក្សប្រជាជនគឺជាទីតាំងដ៏ សំខាន់មួយរបស់ចិនក្នុងការពង្រឹងឥទ្ធិពលក្នុងតំបន់ទល់នឹងសហរដ្ឋ អាមេរិក។ ក្នុងន័យនេះ ការបន្តកាន់អំណាចរបស់គណបក្សប្រជាជនកម្ពុជាគឺជាអំណោយផលយ៉ាងល្អ សម្រាប់មហាយក្សអាស៊ី។ ទន្ទឹមនឹងនេះ ចិនក៏ច្បាស់ជានឹងមិនអាចមើលរំលងបានឡើយអំពីការវិវឌ្ឍរបស់បក្ស ប្រឆាំងនៅកម្ពុជាដែលលម្អៀងទៅរកបស្ចឹមប្រទេស។
ជាក់ស្តែង នៅពេលដែលស្ថានការណ៍ក្រោយពេលបោះឆ្នោតកំពុងជួបប្រទះនឹងភាពតាន តឹងដោយសារតែបក្សប្រឆាំងតវ៉ាជំទាស់ទៅនឹងលទ្ធផលបោះឆ្នោត និងក្នុងខណៈដែលបស្ចឹមប្រទេសកំពុងតាមដានមើលការវិវឌ្ឍនេះដោយយក ចិត្តទុកដាក់នោះ ចិនក៏មិនបង្អង់យូរដែរក្នុងការចេញមុខគាំទ្រគណបក្សប្រជាជន កម្ពុជាដែលជាដៃគូចាក់ទឹកមិនលិចរបស់ខ្លួន។
ពិតហើយថា ចិននិងសហរដ្ឋអាមេរិកកំពុងសម្លឹងមើលអាស៊ីប៉ាស៊ីហ្វិកថាជាគោលដៅ យុទ្ធសាស្ត្រដ៏សំខាន់របស់ខ្លួនក្នុងសតវត្សរ៍ថ្មីនេះ។ ដូច្នេះ ចិនប្រាកដជាមិនបណ្តោយឲ្យកម្ពុជាដែលជាមិត្តដ៏យូរលង់របស់ខ្លួន ងាកទៅរកដៃគូថ្មីដោយងាយនោះឡើយ។ តាមពិតទៅ ស្ថានភាពបែបនេះ អាចផ្តល់ផលប្រយោជន៍ច្រើនដល់កម្ពុជាទៅវិញទេ ប្រសិនណាបើអ្នកនយោបាយខ្មែរចេះទាញយកផលចំណេញពីមហាអំណាចទាំង នោះ។ ផលចំណេញអាចនឹងទទួលបានដរាបណាកម្ពុជាចេះរក្សាជំហរប្រកបដោយភាព វៃឆ្លាតមួយ។ ផ្ទុយទៅវិញ ការដាក់ខ្លួនឲ្យស្ថិតនៅផ្តាច់មុខក្រោមឥទ្ធិពលមហាអំណាចណាមួយ វានឹងធ្វើឲ្យប្រទេសជួបគ្រោះថ្នាក់ជាមិនខាន។
និន្នាការរបស់អ្នកនយោបាយខ្មែរពេលនេះហាក់កំពុងបង្ហាញសញ្ញាគួរឲ្យ ព្រួយបារម្ភ។ ព្រួយបារម្ភនៅត្រង់ថា នៅពេលដែលជម្លោះនយោបាយផ្ទៃក្នុងកំពុងពុះកញ្ជ្រោលឡើងកាន់តែខ្លាំង អ្នកនយោបាយច្រើនតែរត់រកខ្នងបង្អែកពីមហាអំណាចរៀងៗខ្លួន។ ជាក់ស្តែង គណបក្សប្រជាជនកម្ពុជាកំពុងបង្ហាញទំនោរទៅរកចិនកាន់តែខ្លាំងឡើង ជាលំដាប់។ ចំណែកឯគណបក្សប្រឆាំងវិញដែលកំពុងតែកើនប្រជាប្រិយភាពទន់ទោរទៅរក លោកខាងលិចជាពិសេសគឺសហរដ្ឋអាមេរិក។
ដូច្នេះ ប្រសិនបើគេមិនប្រយ័ត្នទេ និន្នាការនេះអាចនឹងនាំប្រទេសកម្ពុជាទៅរកការបែកបាក់ជាពីរចំណែក ក្រោមឥទ្ធិពលរបស់មហាអំណាចដែលមានបន្ទាត់នយោបាយខុសគ្នាជាមិនខាន។ សូមកុំភ្លេចថា បញ្ហាវឹកវរដែលនាំដល់អំពើហិង្សាបង្ហូរឈាម ឬក៏ឈានដល់សង្គ្រាមស៊ីវិលដ៏ខ្ទេចខ្ទាំ ដូចជានៅលីប៊ី ស៊ីរី និងនៅអេហ្ស៊ីប សព្វថ្ងៃជាដើមសុទ្ធសឹងជាលទ្ធផលនៃការបែកបាក់ផ្ទៃក្នុងដោះស្រាយ មិនចេញ។ ទីបំផុត ភាគីនីមួយៗក៏បែរមកប្រយុទ្ធគ្នាក្រោមឥទ្ធិពលនិងសព្វាវុធរបស់មហា អំណាចដែលគាំទ្រពីក្រោយខ្នងរៀងៗខ្លួន។
នេះគឺជាបទពិសោធន៍ដ៏ល្អនិងជាក់ស្តែងបំផុតសម្រាប់អ្នកនយោបាយខ្មែរ។ ដូច្នេះ ផ្លូវដ៏ល្អបំផុតគឺការដោះស្រាយបញ្ហាផ្ទៃក្នុងរវាងខ្មែរនិងខ្មែរ គ្នាឯងដោយរក្សាឲ្យបានជាដាច់ខាតនូវឯកភាពជាតិ។ រីឯមហាអំណាចវិញ អ្នកនយោបាយគ្រប់ភាគី គួរតែប្រើភាពឈ្លាសវៃដើម្បីទាញយកប្រយោជន៍ពីពួកគេមកអភិវឌ្ឍន៍ ប្រទេស។ នេះទើបជានយោបាយឈា្លសវៃដើម្បីប្រយោជន៍ជាតិដែលអ្នកនយោបាយខ្មែរ គួរតែធ្វើឲ្យបាន៕
0 comments:
Post a Comment