ដោយ ដែន អយុធ្យា
2013-08-22
RFA2013-08-22
ស្ដាប់ ឬ ទាញយកសំឡេង 
ព្រះមហាក្សត្រ សម្ដេចព្រះបរមនាថ នរោត្ដម សីហមុនី ក្នុងឱកាសយាងសម្ពោធសាខាមន្ទីរពេទ្យកុមារជយវរ្ម័នទី៧ ក្នុងខេត្តសៀមរាប នាថ្ងៃទី៣០ ធ្នូ ២០០៨។
RFA/Savyouth
ក្រោយជំនួបបិទទ្វាររយៈពេល ២ម៉ោង រវាងក្រុមការងារថ្នាក់ក្រោមរបស់គណបក្សប្រជាជនកម្ពុជា និងគណបក្សសង្គ្រោះជាតិ ត្រូវបរាជ័យជាលើកទី២ កាលពីថ្ងៃទី២០ ខែសីហា រួចមក អ្នកវិភាគនយោបាយឯករាជ្យយល់ថា មានតែតួអង្គព្រះមហាក្សត្រទេ ទើបទម្លាយភាពទាល់ច្រកនេះបាន។
លោកបណ្ឌិត សុខ ទូច អ្នកវិភាគឯករាជ្យ និងជាសកលវិទ្យាធិការសកលវិទ្យាល័យខេមរៈ បានចាត់ទុកជំនួបពិភាក្សាផ្ដើមដោយក្រុមការងារគណបក្សប្រជាជន កម្ពុជា និងគណបក្សសង្គ្រោះជាតិ មិនអាចរកដំណោះស្រាយជុំវិញភាពមិនប្រក្រតីនៃការបោះឆ្នោតបានទេ។
លោក សុខ ទូច មានទំនុកចិត្តមុតមាំទៅលើតួអង្គព្រះមហាក្សត្រថាជាអ្នកសម្រប សម្រួល និងដើរតួសំខាន់ក្នុងការសម្របសម្រួលស្ថានការណ៍នយោបាយ និងបញ្ហាផ្សេងៗ ដែលកើតមានទាំងមុន និងក្រោយការបោះឆ្នោតជាតិអាណត្តិទី៥ ថ្ងៃទី២៨ ខែកក្កដា។
អ្នកវិភាគរូបនេះ មើលឃើញថា ជំនួបនានាផ្ដើមដោយមន្ត្រីថ្នាក់ក្រោមរបស់គណបក្សប្រជាជនកម្ពុជា និងបក្សសង្គ្រោះជាតិ មិនអាចទម្លាយភាពទាល់ច្រកបានទេ ហើយជំនួបនោះជាការចំណាយពេលវេលាឥតប្រយោជន៍។
ទាក់ទងបញ្ហានេះដែរ លោក កែម ឡី អ្នកស្រាវជ្រាវការអភិវឌ្ឍសង្គម និងជាអ្នកវិភាគនយោបាយឯករាជ្យ ក៏បានរិះគន់ជំនួបពិភាក្សារវាងមន្ត្រីថ្នាក់ទាបគណបក្សប្រជាជន កម្ពុជា និងគណបក្សសង្គ្រោះជាតិ ថាមិនអាចដោះស្រាយវិវាទធំបានទេ។
ត្រង់ចំណុចនេះ លោក កែម ឡី យល់ថា បើជាជំនួបធ្វើឡើងដោយមេដឹកនាំកំពូលៗរបស់គណបក្សទាំងពីរ ទំនាស់ ឬភាពមិនប្រក្រតីនៃការបោះឆ្នោតដែលបក្សប្រឆាំងស្នើឲ្យមានការ ស៊ើបអង្កេត និងពិនិត្យឡើងវិញ នឹងអាចរកដំណោះស្រាយបានឆាប់។ លោក កែម ឡី រិះគន់ការបង្កើតក្រុមការងារថ្នាក់ទាប រវាងគណបក្សមានអាសនៈក្នុងរដ្ឋសភាទាំងពីរ ហើយរង់ចាំចម្លើយរបស់មេដឹកនាំកំពូលថា មិនអាចពន្លឿនការដោះស្រាយបញ្ហាខ្វែងគំនិតគ្នាបានទេ។
កាលពីថ្ងៃទី២០ ខែសីហា ក្រុមការងាររបស់គណបក្សប្រជាជនកម្ពុជា ដឹកនាំដោយ លោក ព្រំ សុខា និងក្រុមការងារគណបក្សសង្គ្រោះជាតិ ដឹកនាំដោយ លោក សុន ឆ័យ មានមនុស្សម្ខាងៗចំនួន ៥នាក់ បានជួបប្រជុំគ្នាជាលើកទី២ នៅមន្ទីររដ្ឋសភា តែត្រូវបរាជ័យដូចជំនួបលើកទី១ដែរ។
យ៉ាងនេះក្តី លោក ព្រំ សុខា ប្រធានដឹកនាំក្រុមការងារគណបក្សប្រជាជនកម្ពុជា បានចាត់ទុកជំនួបលើកទី២ រវាងក្រុមការងាររបស់គណបក្សទាំងពីរថា ជាសញ្ញាឈានទៅរកដំណោះស្រាយជុំវិញការងារបោះឆ្នោតក្នុងពេលឆាប់ៗ។ លោកមានជំនឿថា កិច្ចពិភាក្សាពាក់ព័ន្ធនឹងការងារបោះឆ្នោត ឬបញ្ហាផ្សេងៗ អាចមានដំណោះស្រាយក្នុងជំនួបលើកក្រោយ។
ក្រោយជំនួបបិទទ្វារ កាលពីថ្ងៃទី២០ ខែសីហា គណបក្សទាំងពីរបានចេញសេចក្តីប្រកាសរួម មានចុះហត្ថលេខា លោក ព្រំ សុខា និង លោក សុន ឆ័យ។ ប៉ុន្តែ សេចក្តីប្រកាសនោះមិនមានខ្លឹមសារជាដុំកំភួនទេ គឺបានត្រឹមស្វែងយល់ពីបំណង និងគោលគំនិតពីគ្នាទៅវិញទៅមក និងរាយការណ៍ខ្លឹមសារជំនួបជូនថ្នាក់ដឹកនាំគណបក្សរៀងៗខ្លួន ដើម្បីពិនិត្យលទ្ធភាពបន្តជួបលើកក្រោយទៀត។
បញ្ហានេះ លោក សុន ឆ័យ ប្រធានក្រុមការងារគណបក្សសង្គ្រោះជាតិ បានខកចិត្ត ដែលកិច្ចប្រជុំរវាងក្រុមការងារគណបក្សទាំងពីរអស់រយៈពេល ២ម៉ោង ត្រូវបរាជ័យជាលើកទី២ ទៀត។ លោក សុន ឆ័យ ពេលផ្តល់សម្ភាសដល់អ្នកកាសែតនៅមន្ទីររដ្ឋសភា ហាក់មិនបានបង្ហាញពន្លឺដែលឈានដល់គណបក្សទាំងពីរអាចរកដំណោះស្រាយ ពាក់ព័ន្ធភាពមិនប្រក្រតីនៃការបោះឆ្នោតសភាត្រូវរ៉ូវគ្នាទេ។ ជាងនេះ ក្រុមការងារគណបក្សទាំងពីរ ក៏មិនបានកំណត់ថ្ងៃបន្តជួបពិភាក្សាគ្នា លើបញ្ហាបោះឆ្នោតខ្វែងគំនិតនេះនៅពេលណាឲ្យពិតប្រាកដដែរ។
ត្រង់ចំណុចនេះ អ្នកវិភាគឯករាជ្យបានរិះគន់ជំនួបពិភាក្សាធ្វើឡើងដោយក្រុមការងារ ថ្នាក់ក្រោម រវាងគណបក្សប្រជាជនកម្ពុជា និងបក្សសង្គ្រោះជាតិ ហើយគ្មានវត្តមានថ្នាក់ដឹកនាំកំពូលៗរបស់បក្ស ថាមិនអាចរកដំណោះស្រាយឃើញទេ។
ទោះយ៉ាងណា មន្ត្រីគណបក្សទាំងពីរនៅមានក្តីសង្ឃឹមថា ក្រោយជំនួបជាលើកទី២ ដើម្បីស្វែងរកដំណោះស្រាយពាក់ព័ន្ធនឹងការបោះឆ្នោតសភាអាណត្តិទី៥ នឹងមានដំណោះស្រាយក្នុងពេលឆាប់ៗនេះ៕
0 comments:
Post a Comment