ដោយ ដែន អយុធ្យា
2013-09-02
RFA2013-09-02
បន្ទាប់ពីឃើញមានការឆ្លើយឆ្លងលិខិតទៅវិញទៅមករវាងតំណាងគណបក្ស ប្រជាជនកម្ពុជា និងគណបក្សសង្គ្រោះជាតិ ក្នុងការបង្កើតគណៈកម្មការចម្រុះ ដើម្បីស៊ើបអង្កេតលើភាពមិនប្រក្រតីនៃដំណើរការបោះឆ្នោតថ្ងៃទី២៨ ខែកក្កដា មក ក្រុមសង្គមស៊ីវិលចំនួន ២១អង្គភាព នៅព្រឹកថ្ងៃច័ន្ទ ទី២ ខែកញ្ញា បានរួមគ្នាចេញសេចក្ដីថ្លែងការណ៍ផ្ដល់អនុសាសន៍ដល់មេគណបក្សទាំង ពីរ ឲ្យឆាប់បង្កើតគណៈកម្មការនោះឲ្យបានឆាប់។
លោក ធន សារាយ ជាប្រធានសមាគមអាដហុក (ADHOC) មានប្រសាសន៍នៅក្នុងសន្និសីទកាសែតនាទីស្នាក់ការអង្គការខុមហ្វែ្រល (Comfrel) ព្រឹកថ្ងៃច័ន្ទ ទី២ ខែកញ្ញា ថា បន្ទប់ស្ថានការណ៍នៃអង្គការសមាគមមិនមែនរដ្ឋាភិបាលទាំង ២១អង្គភាព បានផ្ដល់នូវអនុសាសន៍ជាក់លាក់ថា ទោះបីមិនទាន់មានជំនួបកំពូលនៃមេដឹកនាំគណបក្សទាំងពីរក្តី ប៉ុន្តែកាលៈទេសៈនេះ គណបក្សទាំងពីរគួរបញ្ជូនប្រតិភូជាន់ខ្ពស់បន្តជួបជជែកគ្នាអំពី ការបង្កើតគណៈកម្មការស៊ើបអង្កេតចម្រុះជាបន្ទាន់នេះ ដើម្បីអង្កេតទៅលើភាពមិនប្រក្រតីដែលអាចធ្វើឲ្យប៉ះពាល់ដល់ លទ្ធផលបោះឆ្នោត។
សង្គមស៊ីវិលឲ្យដឹងថា គណៈកម្មការស៊ើបអង្កេតចម្រុះដែលស្នើបង្កើតមកនេះ ត្រូវមានសមាសភាពចូលរួមពីតំណាងបក្សប្រជាជនកម្ពុជា តំណាងបក្សសង្គ្រោះជាតិ តំណាងអង្គការសហប្រជាជាតិ និងអង្គការអន្តរជាតិជាអ្នកសង្កេតការណ៍ និងអាចផ្ដល់បច្ចេកទេស អង្គការសង្គមស៊ីវិលជាអ្នកស៊ើបអង្កេត ឬផ្ដល់របាយការណ៍ពីលទ្ធផលស្រាវជ្រាវ និងអនុសាសន៍ និងតំណាង គ.ជ.ប ជាអ្នកសម្របសម្រួលការប្រជុំ និងអ្នកគាំទ្រផ្ដល់ព័ត៌មាន និងឯកសារពាក់ព័ន្ធចាំបាច់ក្នុងការអង្កេតស្រាវជ្រាវ។
ជាងនេះ គណបក្សសង្គ្រោះជាតិ និងបក្សប្រជាជន ត្រូវធ្វើជាប្រធានប្ដូរវេននៃគណៈកម្មការនេះ ហើយជាអ្នកសម្រេចទំហំនៃការអង្កេតស្រាវជ្រាវ ព្រមទាំងជាអ្នកសម្រេចយកអនុសាសន៍ពីការអង្កេតស្រាវជ្រាវទៅឲ្យ គ.ជ.ប អនុវត្តន៍។
សេចក្ដីថ្លែងការណ៍របស់ក្រុមអង្គការសង្គមស៊ីវិលក៏បានផ្ដល់ អនុសាសន៍បន្ទាន់ ឲ្យមានការអង្កេតស្រាវជ្រាវពិសេសលើភាពមិនប្រក្រតីដែលអាចនាំមក នូវការបោះឆ្នោត និងការរាប់សន្លឹកឆ្នោតឡើងវិញនៅការិយាល័យខ្លះ នាមណ្ឌលខេត្តកណ្ដាល និងសៀមរាប។ ជាពិសេសគណបក្សនយោបាយទាំងពីរក៏អាចពិភាក្សាអង្កេតទៅលើខេត្ត មួយចំនួនទៀត មានដូចជា មណ្ឌលខេត្តកំពង់ចាម បាត់ដំបង ភ្នំពេញ សៀមរាប កណ្ដាល ក្រចេះ និង ព្រៃវែង ដោយយកចិត្តទុកដាក់ផ្ទៀងផ្ទាត់លទ្ធផលបោះឆ្នោត និងភាពមិនប្រក្រតីនៃទម្រង់ ១១០២ និង ១១០៨ នៅក្នុងកញ្ចប់សុវត្ថិភាព "ក" ជាមួយលទ្ធផលបោះឆ្នោតទម្រង់ ១១០៤។
0 comments:
Post a Comment