កងរាជអាវុធហត្ថកំពុងហ្វឹកហាត់ នៅពហុកីឡដ្ឋានជាតិ ក្នុងទីក្រុងភ្នំពេញ។
RFI/ Siv Chana
បន្ទាប់ពីការប្រមូលផ្តុំកម្លាំងនគរបាលមកហ្វឹកហាត់ កាលពីថ្ងៃអាទិត្យ ឥឡូវនេះដល់វេនកម្លាំងកងរាជអាវុធហត្ថវិញម្តង។ កងកម្លាំងត្រូវបានគេដឹកទៅប្រមូលផ្តុំគ្នា នៅតាមគោលដៅនានា ដើម្បីហ្វឹកហាត់សមការពារសន្តិសុខ និងទប់ទល់បាតុកម្មរបស់គណបក្សសង្គ្រោះជាតិ។ កម្លាំងកងរាជអាវុធហត្ថក៏គ្រោងហ្វឹកហាត់បាញ់គ្រាប់ពិតថែមទៀត នៅថ្ងៃទី៥កញ្ញាខាងមុខ នៅក្នុងខេត្តកំពង់ឆ្នាំង។
បើយោងតាមលោក ខេង ទីតូ កងកម្លាំងទាំងនោះដែលមកពីអង្គភាពផ្សេងៗគ្នា ចាំបាច់ត្រូវហ្វឹក ហាត់អំពីក្បួនយុទ្ធសាស្ត្រឲ្យស៊ីសង្វាក់គ្នា ក្នុងការត្រៀមទប់ ទល់ក្នុងករណីដែលមានអំពើហិង្សាកើតឡើង។ ការចល័តកងកម្លាំង និងការហ្វឹកហាត់ក្បួនយុទ្ធសាស្ត្រ ក៏ត្រូវបានបើកធ្វើដូចគ្នា ដែរ នៅតាមបណ្តាខេត្តនានា។ លើសពីនេះ ការហ្វឹកហាត់បាញ់គ្រាប់ពិត ក៏ត្រូវគេគ្រោងបើកធ្វើ នៅថ្ងៃទី ៥កញ្ញាខាងមុខនេះដែរ នៅឯភ្នំជំរាល ក្នុងខេត្តកំពង់ឆ្នាំង។ នេះបើយោងតាមប្រភពពីអ្នកនាំពាក្យ កងរាជអាវុធហត្ថលើផ្ទៃប្រទេសដដែល។
កាលពីថ្ងៃអាទិត្យកន្លងទៅ កម្លាំងនគរបាលមកពីគ្រប់ខណ្ឌក្នុងរាជធានីភ្នំពេញ ប្រមាណជាង ២០០០នាក់ ក៏ត្រូវបានប្រមូលផ្តុំនៅឯកោះពេជ្រ ដើម្បីហ្វឹកហាត់ក្បួនយុទ្ធ សាស្ត្រទប់ទល់ជាមួយបាតុកម្មដូចគ្នានេះដែរ។ ការចល័តកងកម្លាំងប្រដាប់អាវុធនិងការហ្វឹកហាត់មានសកម្មភាព កាន់តែខ្លាំងឡើង បន្ទាប់ពីគណបក្សសង្គ្រោះជាតិប្រកាសធ្វើបាតុកម្មអហិង្សា នៅថ្ងៃទី ៧កញ្ញាខាងមុខនេះ ដើម្បីប្រឆាំងលទ្ធផលបោះឆ្នោត។
គណបក្សប្រឆាំងក៏បានហ្វឹកហាត់ដល់ក្រុមបាតុកររបស់ខ្លួន អំពីយុទ្ធវិធី ធ្វើបាតុកម្មអហិង្សា និងអំពីវិធីការពារខ្លួនពេលមានការបង្ក្រាបថែមទៀត។
ទោះបីជាគណបក្សប្រឆាំងបានប្រកាសពីមហាបាតុកម្មអហិង្សា ឬក៏ជាពិធីបួងសួងដើម្បីសុំសន្តិភាពយ៉ាងណាក៏ដោយ ក៏ក្នុងក្រសែភ្នែករបស់អាជ្ញាធរគណបក្សកាន់អំណាច បាតុកម្មនេះទំនងជាមានគោលដៅវែងឆ្ងាយជាងនេះ។ អ៊ីចឹងហើយបានជាពួកគេប្រយ័ត្នប្រយែងយ៉ាងខ្លាំង ចំពោះមហាបាតុកម្មរបស់គណបក្សប្រឆាំង៕
0 comments:
Post a Comment