RFI
កម្មករកម្មការិនីកម្ពុជា
RFI
ក្រសួងការងារនិងបណ្តុះបណ្តាលវិជ្ជាជីវៈបានអំពាវ នាវដល់កម្មករ និងអ្នកដឹកនាំសហជីពឲ្យរក្សាភាពស្ងៀមស្ងាត់ និងបន្តបំពេញការងារតាមកន្លែងរៀងៗខ្លួន។ ការអំពាវនាវនេះបានធ្វើឡើង ក្នុងគ្រាដែលគណបក្សសង្រ្គោះជាតិប្រកាស ធ្វើមហាបាតុកម្ម ថ្ងៃទី៧ ខែកញ្ញា។ នេះជាការអំពាវនាវថ្មីទៀតក្នុងចំណោមការអំពាវនាវជាបន្តបន្ទាប់ របស់ក្រសួងមានសមត្ថកិច្ចក្នុងបំណងទប់ស្កាត់កុំឲ្យមានអ្នក ចូលរួមបាតុកម្មច្រើន។
ក្នុងលិខិតចុះថ្ងៃទី២ ខែកញ្ញា ក្រសួងការងារនិងបណ្តុះបណ្តាលវិជ្ជាជីវៈបានអំពាវនាវសហជីព កម្មករ និយោជិត និងនិយោជករក្សាភាពនឹងនរ និងស្ងៀមស្ងាត់ហើយបន្តបំពេញភារកិច្ចតាមតួនាទីរៀងៗខ្លួន។ សេចក្តីអំពាវនាវនេះបានប្រាប់សហជីព កម្មករ មិនឲ្យជឿតាមការឃោសនារបស់អ្នកនយោបាយដែលនាំឲ្យបាត់បង់សណ្តាប់ ធ្នាប់សាធារណៈ និងដែលប៉ះពាល់ដល់ជីវភាពរបស់ខ្លួន។
ក្រសួងការងារបញ្ជាក់ទៀតថា រដ្ឋាភិបាលកម្ពុជាតែងតែយកចិត្តទុកដាក់ដល់ជីវភាពកម្មករ និយោជិតជានិច្ច។ ជាក់ស្តែង ការបង្កើតក្រុមការងារចម្រុះត្រីភាគី និងដៃគូពាក់ព័ន្ធដើម្បីបន្តការសិក្សាស្រាវជ្រាវអំពីបញ្ហាដំឡើង ប្រាក់ឈ្នួលជូនកម្មករ និយោជិត ត្រូវបានក្រសួងការងារលើកមកធ្វើជាអំណះអំណាង។
សេចក្តីអំពាវនាវនេះបានធ្វើឡើងតែប៉ុន្មានថ្ងៃប៉ុណ្ណោះ មុនមហា បាតុកម្មរបស់គណបក្សប្រឆាំងដែលគ្រោងបើកធ្វើនៅថ្ងៃទី ៧កញ្ញាខាងមុខ និងបន្ទាប់ពីសហភាពសហជីពកម្ពុជារបស់លោក រ៉ុង ឈុន ប្រកាសឲ្យសមាជិករបស់ខ្លួនចូលរួមបាតុកម្មជាមួយបក្សប្រឆាំង។
គួរកត់សម្គាល់ថា ចាប់តាំងពីគណបក្សសង្គ្រោះជាតិបានប្រកាសកាលបរិច្ឆេទនៃមហាបាតុកម្ម ប្រឆាំងលទ្ធផលបោះឆ្នោតមក អាជ្ញាធរមានសមត្ថកិច្ច រួមទាំងស្ថាប័នកំពូលៗរបស់ជាតិ ដូចជាស្ថាប័នព្រះមហាក្សត្រ ស្ថាប័នសាសនាដែលមានសម្តេចព្រះសង្ឃរាជទាំងពីរគណៈក្រសួងមហាផ្ទៃ ក៏ដូចជារដ្ឋាភិបាល និងគណបក្សប្រជាជនកម្ពុជាដែលកំពុងគ្រប់គ្រងអំណាចដែរ បានចេញសេចក្តីអំពាវនាវជាបន្តបន្ទាប់ឲ្យប្រជាពលរដ្ឋមានភាពស្ងប់ស្ងាត់។
ទន្ទឹមនឹងការអំពាវនាវនេះ កម្លាំងសមត្ថកិច្ចគ្រប់ប្រភេទ មានទាំងនគរបាល ទាហាន និងកងរាជអាវុធហត្ថត្រូវបានប្រមូលផ្តុំ ហ្វឹកហាត់ និងចល័តទៅកាន់គោលដៅដើម្បីត្រៀមលក្ខណៈទប់ទល់ជាមួយមហាបាតុកម្ម។ កម្មករ និយោជិតក្នុងវិស័យកាត់ដេរសម្លៀកបំពាក់និងស្បែកជើងដែលជាផ្ទាំង ស៊ីបរបស់អ្នកនយោបាយនោះ ក៏ក្រសួងមានសមត្ថកិច្ចមិនអាចមើលរំលងបានដែរ៕
0 comments:
Post a Comment