ដោយ ដែន អយុធ្យា
2013-09-04
RFA2013-09-04
ស្ដាប់ ឬ ទាញយកសំឡេង 
ក្រុមបាតុករគណបក្សសង្គ្រោះជាតិ ចូលរួមហ្វឹកហាត់របៀបធ្វើបាតុកម្មនៅទីលានប្រជាធិបតេយ្យ នៅថ្ងៃទី១ កញ្ញា ឆ្នាំ២០១៣។
RFA/Mom Sophon
លោកបណ្ឌិត ហង្ស ពុទ្ធា ជានាយកប្រតិបត្តិអង្គការនិកហ្វិច (NICFEC) ស្ថិតក្នុងចំណោមអង្គការ សមាគមមិនមែនរដ្ឋាភិបាលទាំង ២១ស្ថាប័ន មានប្រសាសន៍ថា អង្គការនេះបានបង្កើតគណៈកម្មការចំនួន ៨ ដាច់ដោយឡែកពីគ្នា ដើម្បីអង្កេតការណ៍ធ្វើមហាបាតុកម្មអហិង្សានេះ។
លោកថា ការបង្កើតគណៈកម្មការនេះឡើង ព្រោះបារម្ភខ្លាចមានសកម្មភាពរំលោភសិទ្ធិមនុស្ស ឬសកម្មភាពគំរាមកំហែងចាប់ខ្លួនអ្នកចូលរួមធ្វើបាតុកម្ម រំលោភច្បាប់ជាដើម៖ «បង្កើតនូវគណៈកម្មការចំនួន ៨ ដើម្បីចូលរួមអង្កេតទៅលើព្រឹត្តិការណ៍ទាំងឡាយនៃដំណើរការ បាតុកម្ម។
ហើយក៏មានក្រុមអន្តរាគមន៍ផ្លូវច្បាប់ ព្រោះនៅពេលមានសភាពការណ៍ច្របូកច្របល់ ជួនកាលអ្នកខ្លះអត់ដឹងរឿង ក៏ត្រូវគេចោទប្រកាន់ថាខុសច្បាប់នេះ ខុសច្បាប់នោះ ហើយក៏ត្រូវគេចាប់ខ្លួនផងដែរ។ អ៊ីចឹង យើងក៏មានអន្តរាគមន៍ខាងផ្លូវច្បាប់។ មួយទៀតក៏មានក្រុមអន្តរាគមន៍ដូចជាបញ្ហាថ្នាំពេទ្យ ឬការសង្គ្រោះ និងជួយលើបញ្ហាផ្សេងៗទៀត»។
ទោះយ៉ាងណា លោកបណ្ឌិត ហង្ស ពុទ្ធា បានស្នើដល់សមត្ថកិច្ចចម្រុះពាក់ព័ន្ធ និងចូលរួមធ្វើមហាបាតុកម្ម ត្រូវរក្សាភាពស្ងប់ស្ងៀម និងមិនត្រូវបង្កអំពើហិង្សាណាមួយទេ។
លិខិតជូនដំណឹងគណបក្សសង្គ្រោះជាតិ ផ្ញើជូនលោកអភិបាលរាជធានីភ្នំពេញ ចុះថ្ងៃទី២ ខែកញ្ញា បានបញ្ជាក់ថា មហាបាតុកម្មអហិង្សានៅព្រឹកថ្ងៃសៅរ៍ ទី៧ ខែកញ្ញា នាទីលានប្រជាធិបតេយ្យ ដើម្បីទាមទារឲ្យបង្កើតគណៈកម្មការពិសេសឯករាជ្យ សម្រាប់ស៊ើបអង្កេតរកការពិត និងយុត្តិធម៌នៃលទ្ធផលបោះឆ្នោតថ្ងៃទី២៨ ខែកញ្ញា។
មហាបាតុកម្មអហិង្សានេះ មានទាំងការតាំងសមាធិ ការបួងសួងដោយស្ងប់ស្ងៀម និងការសម្ដែងមតិរបស់បាតុករ ហើយចំនួនមនុស្សអាចមានអ្នកចូលរួមប្រមាណ ២ម៉ឺននាក់។
លិខិតរបស់គណបក្សសង្គ្រោះជាតិ ក៏បានស្នើដល់អភិបាលរាជធានីភ្នំពេញ ជួយមានវិធានការការពារសន្តិសុខ សុវត្ថិភាព ជូនដល់ក្រុមបាតុករផងដែរ។
លោក សន ម៉ាក់ឃីនថូស (Sean McIntosh) មន្ត្រីទំនាក់ទំនងកិច្ចការសាធារណៈនៃស្ថានទូតសហរដ្ឋអាមេរិក ប្រចាំកម្ពុជា បានឲ្យដឹងតាមរយៈអ្នកបកប្រែភាសា ដោយចាត់ទុកការធ្វើមហាបាតុកម្មនេះ អាចផ្តល់ឱកាសដល់បាតុករ ឬពលរដ្ឋ បានសម្ដែងមតិលើបញ្ហាផ្សេងៗ៖ «ខ្ញុំមិនមែនតស៊ូមតិ ប្រឆាំងបាតុកម្មទេ។ មានបាតុកម្ម គឺល្អ ពីព្រោះបាតុកម្មជាច្រកសម្រាប់ឱ្យមនុស្សទាំងឡាយអាចនិយាយក្ដី ព្រួយបារម្ភរបស់ខ្លួន និងជាច្រកសម្រាប់បញ្ចេញមតិលើអ្វីដែលសំខាន់។ និយាយពីបាតុកម្ម គឺត្រូវតែជាបាតុកម្មសន្តិវិធី និងគួរមានលក្ខណៈស្ថាបនា។ ភាគីទាំងពីរ ជាចាំបាច់ជួបគ្នា។ គេត្រូវត្រឡប់មកជួបគ្នានៅតុចរចា ហើយជជែកគ្នាអំពីបញ្ហាសំខាន់សម្រាប់ពលរដ្ឋកម្ពុជា សម្រាប់ភាពរីកចម្រើននៃលទ្ធិប្រជាធិបតេយ្យ។ ខ្ញុំនឹងមិនធ្វើអត្ថាធិប្បាយអំពីអ្វីដែលជាការទាយទុកមុនទេ ប៉ុន្តែជាថ្មីម្ដងទៀត យើងលើកទឹកចិត្តចំពោះការជួបជុំគ្នាដោយសន្តិវិធីនៃគ្រប់បក្ស ឬភាគីទាំងបក្សប្រឆាំង បក្សគ្រប់គ្រងអំណាច។ ប៉ុន្តែ ប្រការសំខាន់ គឺការជួបជុំនោះដោយសន្តិវិធី គ្មានអំពើហិង្សា មិនមានប្រភពបំភិតបំភ័យ ឬជាសក្ដានុពលធ្វើឱ្យមានភាពវឹកវរឡើយ»។
បញ្ហានេះដែរ គណៈបញ្ជាការសន្តិសុខអចិន្ត្រៃយ៍សម្រាប់ការបោះឆ្នោតរបស់រាជ រដ្ឋាភិបាល មានចុះហត្ថលេខា លោក ស ខេង រដ្ឋមន្ត្រីក្រសួងមហាផ្ទៃ បានចេញសេចក្តីណែនាំចុះថ្ងៃទី១ ខែកញ្ញា អំពាវនាវដល់ស្ថាប័នពាក់ព័ន្ធ ឲ្យលើកកម្ពស់រក្សាការពារសន្តិសុខ របៀបរៀបរយសាធារណៈសង្គម និងជំរុញឲ្យការធ្វើសកម្មភាពនានា ប្រព្រឹត្តទៅស្របតាមច្បាប់ជាធរមាន៕
0 comments:
Post a Comment