ដោយ យន់ សាមៀន
2013-08-15
RFA2013-08-15
ស្ដាប់ ឬ ទាញយកសំឡេង 
សមាជិកគណៈកម្មាធិការអចិន្ត្រៃយ៍គណបក្សសង្គ្រោះជាតិ លោក គួយ ប៊ុនរឿន (ស្ដាំ)។ រូបភាពឯកសារ
RFA/Mom Sophon
លោក គួយ ប៊ុនរឿន មានប្រសាសន៍ថា គណបក្សសង្គ្រោះជាតិ បានសរសេរលិខិតទៅគណបក្សប្រជាជនកម្ពុជា ដើម្បីស្វែងរកកិច្ចចរចាបន្តទៀត ប៉ុន្តែ គណបក្សប្រជាជនកម្ពុជា បានបដិសេធ៖ «ព្រឹកមិញហ្នឹង ដើម្បីជជែកគ្នាអ្វីដែលយើងបានជជែកកាលពីថ្ងៃទី៩ ហ្នឹង គាត់ក៏បានឆ្លើយជាលិខិតមកវិញ។ ជាគោលជំហរនៅតែឃ្លាតឆ្ងាយដដែល។ សម្រាប់គណបក្សសង្គ្រោះជាតិ បង្កើតគណៈកម្មការឯករាជ្យនេះ គឺយើងមិនអនុញ្ញាតឲ្យ គ.ជ.ប ចូលរួមទេ ទុកឲ្យគណៈកម្មការនោះស្រាវជ្រាវទៅ ហើយនៅពេលគេរកឃើញចំណុចណាមួយនៃភាពមិនប្រក្រតីសុំឲ្យ គ.ជ.ប ផ្តល់កិច្ចសហការ»។
ការបរាជ័យជាថ្មីនេះ កើតឡើងបន្ទាប់ពីមន្ត្រីជាន់ខ្ពស់គណបក្សសង្គ្រោះជាតិ និងគណបក្សប្រជាជនកម្ពុជា បានសម្រេចពិនិត្យលទ្ធភាព ដើម្បីអនុញ្ញាតឲ្យសង្គមស៊ីវិលដែលមានបទពិសោធន៍ក្នុងកិច្ចការបោះ ឆ្នោត ចូលរួមក្នុងគណៈកម្មការស៊ើបអង្កេតភាពមិនប្រក្រតី និងមានអ្នកសង្កេតការណ៍ជាតិ និងអន្តរជាតិ និងតំណាងពីអង្គការសហប្រជាជាតិ។
តំណាងរាស្ត្រជាន់ខ្ពស់គណបក្សប្រជាជនកម្ពុជា លោក ឈាង វុន បដិសេធធ្វើអត្ថាធិប្បាយពាក់ព័ន្ធទៅនឹងភាពបរាជ័យថ្មីនេះ៖ «នៅ មានអ្វីទៀតចង់ជជែកជាមួយខ្ញុំវិទ្យុអាស៊ីសេរី ហ្នឹង។ ជជែកជាមួយខ្ញុំអ្វីទៀត បើចោលម្សៀត យើងខ្មែរដូចគ្នាល្មមហើយ»។
សហរដ្ឋអាមេរិក កាលពីថ្ងៃអង្គារ ទី១៣ សីហា បានស្វាគមន៍ការបង្កើតគណៈកម្មការចម្រុះមួយ ដោយរួមមានគណបក្សនយោបាយទាំងពីរ តំណាងអង្គការសង្គមស៊ីវិល និងអ្នកសង្កេតការណ៍អន្តរជាតិ ឬតំណាងអង្គការសហប្រជាជាតិ។ សហរដ្ឋអាមេរិក បញ្ជាក់ថា វាចាំបាច់ណាស់ដែលគណៈកម្មការស៊ើបអង្កេតភាពមិនប្រក្រតីនេះ ត្រូវបានពលរដ្ឋជឿជាក់ និងអាចទទួលយកបាន៕
បក្សប្រជាជនកម្ពុជា រក្សាគោលជំហរឱ្យ គ.ជ.ប ជាអ្នកដឹកនាំគណៈកម្មការចម្រុះ
ដោយ យ៉ង ចាន់តារាគណបក្សប្រជាជនកម្ពុជា នៅថ្ងៃទី១៥ សីហា បានចេញលិខិតផ្លូវការមួយតបទៅនឹងលិខិតស្នើរបស់បក្សសង្គ្រោះជាតិ សុំឲ្យបន្តកិច្ចប្រជុំក្រុមការងារបច្ចេកទេស ក្នុងដំណើរការបង្កើតគណៈកម្មការចម្រុះស៊ើបអង្កេតភាពមិនប្រក្រតីនៃ លទ្ធផលបោះឆ្នោត។ ខ្លឹមសារនៃលិខិតរបស់គណបក្សប្រជាជនកម្ពុជា បញ្ជាក់ថា៖ «គណបក្សប្រជាជនកម្ពុជា នៅតែប្រកាន់គោលការណ៍លទ្ធិប្រជាធិបតេយ្យ និងអនុវត្តច្បាប់ស្ដីពីការបោះឆ្នោតជ្រើសតាំងតំណាងរាស្ត្រ និងច្បាប់ស្តីពីវិសោធនកម្មច្បាប់ស្ដីពីការបោះឆ្នោតជ្រើសតាំង តំណាងរាស្ត្រ ហើយយកគណៈកម្មាធិការជាតិរៀបចំការបោះឆ្នោត ជាអាជ្ញាកណ្ដាល និងជាអ្នកសម្រេច»។
លិខិតដដែលបានបន្តថា៖ «បើទាត់ចោល គ.ជ.ប ជាអ្នកគ្រប់គ្រង និងដឹកនាំគណៈកម្មការចម្រុះនោះ ការប្រជុំរបស់គណបក្សទាំងពីរក៏មិនទទួលលទ្ធផលល្អទេ ព្រោះថាច្បាប់បានប្រគល់សិទ្ធិឱ្យ គ.ជ.ប រៀបចំ និងដោះស្រាយការងារបោះឆ្នោតសកល និងអសកលនៅកម្ពុជា»។
គណបក្សសង្គ្រោះជាតិ បានផ្ញើលិខិតមួយទៅ លោក ជាម យៀប ប្រធានក្រុមការងារគណបក្សប្រជាជនកម្ពុជា ស្នើបន្តកិច្ចប្រជុំក្រុមការងារនៃគណបក្សទាំងពីរ ពាក់ព័ន្ធនឹងការបោះឆ្នោត បន្ទាប់ពីគណបក្សនេះមិនទាន់បានទទួលចម្លើយណាមួយ ចាប់តាំងពីកិច្ចប្រជុំកាលពីថ្ងៃទី៩ សីហា ឆ្នាំ២០១៣។ នៅក្នុងលិខិតនោះ ក៏បានសំណូមពរឱ្យ លោក ជាម យៀប ផ្តល់ព័ត៌មានពីពេលវេលានៃការប្រជុំបន្ទាប់ទៀត ទៅកាន់គណបក្សសង្គ្រោះជាតិ ផងដែរ។
លោក ជាម យៀប ប្រធានក្រុមការងារគណបក្សប្រជាជនកម្ពុជា បានបញ្ជាក់ថា កិច្ចប្រជុំបន្ត នឹងត្រូវធ្វើឡើងនៅពេល គ.ជ.ប អញ្ជើញភាគីនីមួយៗ។
លោក ជាម យៀប៖ «នៅពេលណាដែល គ.ជ.ប កោះអញ្ជើញ! ព្រោះគេកោះអញ្ជើញម្តងហើយ សុំឱ្យតំណាងគណបក្សប្រជាជនកម្ពុជា មានស្រីមួយរូប។ គណបក្សប្រជាជនកម្ពុជា កន្លងទៅ មានបីរូប មានរូបខ្ញុំជាប្រធាន ឯកឧត្តម ព្រុំ សុខា ជាសមាជិក មានឯកឧត្តម អ៊ុក គឹមហាន ជាសមាជិក។ ទាល់តែពេល គ.ជ.ប គេត្រូវការសុំឱ្យនារីម្នាក់តំណាងនារី អ៊ីចឹងទេ គណបក្សប្រជាជនកម្ពុជា បានជ្រើសលោកជំទាវ ម៉ែន សំអន លោកចូលរួម។ ឯខាងនោះ ពីមុនមកមានតែបីនាក់ដែរទេ គឺមានឯកឧត្តម សុន ឆ័យ ជាប្រធាន ឯកឧត្តម គួយ ប៊ុនរឿន ជាសមាជិក និងឯកឧត្តម យ៉ែម បុញ្ញឫទ្ធិ ជាសមាជិក ហើយបាននិយាយគ្នាម្តងហើយ កាលពីថ្ងៃសុក្រ ទី៩ ខែសីហា ថ្មីៗនេះ»៕
0 comments:
Post a Comment