ដោយ ទេព សុរ៉ាវី និង ដែន អយុធ្យា
2013-08-12
RFA2013-08-12
ពលរដ្ឋចូលរួមបោះឆ្នោតបោះឆ្នោតជ្រើសតាំងតំណាងរាស្ត្រ នីតិកាលទី៥ នាមណ្ឌលបោះឆ្នោត ក្នុងសង្កាត់កាកាប ខណ្ឌពោធិ៍សែនជ័យ នៅថ្ងៃទី២៨ កក្កដា ឆ្នាំ២០១៣។
RFA/Mom Sophon
សូមរង់ចាំអាន និងស្ដាប់ព័ត៌មានបន្ថែម...
គណបក្សសង្គ្រោះជាតិបដិសេធលទ្ធផលបោះឆ្នោតបណ្ដោះអាសន្នរបស់គ.ជ.ប
ក្រោយពេល គ.ជ.ប បានប្រកាសពីលទ្ធផលបណ្ដោះអាសន្ននៃការបោះឆ្នោតសភាអាណត្តិទី៥ នៅព្រឹកថ្ងៃច័ន្ទ ទី១២ ខែសីហា បង្ហាញថា គណបក្សប្រជាជនកម្ពុជា មានសំឡេងនាំមុខ ឬឈ្នះការបោះឆ្នោតរួចមក លោក កឹម សុខា អនុប្រធានគណបក្សសង្គ្រោះជាតិ និងថ្នាក់ដឹកនាំដទៃទៀត បានធ្វើសន្និសីទកាសែតច្រានចោលលទ្ធផលបោះឆ្នោតនេះភ្លាមៗ។
លោក កឹម សុខា អនុប្រធានគណបក្សសង្គ្រោះជាតិ ថ្លែងក្នុងសន្និសីទកាសែត នាទីស្នាក់ការគណបក្សនាខណ្ឌទួលគោក នៅថ្ងៃទី១២ ខែសីហា ឆ្នាំ២០១៣។ RFA/Den Ayuthyea
លោក កឹម សុខា៖ «ការប្រកាសបែបនេះ ក្នុងស្ថានភាពនេះ គឺមានន័យថា គណៈកម្មាធិការជាតិរៀបចំការបោះឆ្នោត ត្រូវទទួលខុសត្រូវទាំងស្រុងចំពោះការកើតឡើងនូវការបះបោរ ឬការតវ៉ាដែលអាចនឹងនាំឲ្យមានអស្ថិរភាពនយោបាយពីសំណាក់ ប្រជាពលរដ្ឋជាម្ចាស់ឆ្នោត ដែលគាត់ទន្ទឹងរង់ចាំរកយុត្តិធម៌ឲ្យគាត់ ហើយការមានៈរបស់ គ.ជ.ប នេះ គឺមានន័យថា មានៈប្រឆាំងនឹងឆន្ទៈរបស់ប្រជាពលរដ្ឋដែលកំពុងតែចង់ដឹងរក យុត្តិធម៌»។
លោក កឹម សុខា នៅតែទទូចឲ្យបង្កើតគណៈកម្មការបច្ចេកទេសចម្រុះឯករាជ្យមួយ និងអំពាវនាវឲ្យគណបក្សប្រជាជនកម្ពុជា ដែលបានសន្យាក្នុងកិច្ចប្រជុំទ្វេភាគីនៅមន្ទីររដ្ឋសភា កាលពីថ្ងៃទី៩ ខែសីហា ឆ្លើយតបបញ្ហានេះ។
មន្ត្រីគណបក្សប្រជាជនកម្ពុជា មិនធ្វើអត្ថាធិប្បាយទេ ចំពោះការច្រានចោលលទ្ធផលបោះឆ្នោតរបស់គណបក្សប្រឆាំង។
លោក ទេព នីថា អគ្គលេខាធិការ គ.ជ.ប បានឲ្យដឹងនៅរសៀលថ្ងៃច័ន្ទ ទី១២ ខែសីហា ថា ការប្រកាសលទ្ធផលបោះឆ្នោតបណ្ដោះអាសន្នពេលនេះ គឺ គ.ជ.ប បានអនុវត្តទៅតាមច្បាប់បោះឆ្នោត ហើយថា បើគណបក្សនយោបាយណាមួយមិនយល់ស្របតាមលទ្ធផលបោះឆ្នោតនេះទេ ពួកគេអាចដាក់ពាក្យបណ្ដឹងចំពោះបញ្ហានេះ។
លោក ទេព នីថា៖ «យើងបានធ្វើឲ្យយឺតកម្មវិធីបោះឆ្នោត ដែលត្រូវផ្សាយលទ្ធផលបណ្ដោះអាសន្ននៃការបោះឆ្នោតហ្នឹងតាំងពីថ្ងៃ ទី១០ ខែសីហា មកម្ល៉េះ ហើយដោយដល់មិនអាចថា បង្កើតគណៈកម្មការចម្រុះបាន ទើប គ.ជ.ប ងាកមកអនុវត្តភារកិច្ចរបស់ខ្លួនបន្ត។ យើងមិនអាចរង់ចាំបានទេ ព្រោះថា ពេលវេលាត្រូវបានកំណត់ដោយច្បាប់។ អ៊ីចឹងហើយបានជា គ.ជ.ប ប្រកាសផ្សាយលទ្ធផលបណ្ដោះអាសន្ននៃការបោះឆ្នោតព្រឹកមិញនេះ (ថ្ងៃទី១២ ខែសីហា) ហើយគណបក្សនយោបាយដែលប្រកួតប្រជែងការបោះឆ្នោត បើមិនយល់ស្របនឹងលទ្ធផលនៃការបោះឆ្នោតទេ គឺអាចប្ដឹងទៅ គ.ជ.ប ឬប្ដឹងទៅក្រុមប្រឹក្សាធម្មនុញ្ញដោយផ្ទាល់តែម្ដងក្នុងរយៈពេល ៧២ម៉ោង»។
យ៉ាងណាក៏ដោយ សេចក្ដីថ្លែងការណ៍របស់គណបក្សសង្គ្រោះជាតិ ផ្សាយនៅថ្ងៃច័ន្ទ ទី១២ ខែសីហា ក៏បានអំពាវនាវដល់សហគមន៍អន្តរជាតិ និងប្រទេសជាហត្ថលេខីនៃកិច្ចព្រមព្រៀងទីក្រុងប៉ារីស ឆ្នាំ១៩៩១ ឲ្យជួយគាំទ្រ ការពារឆន្ទៈប្រជាពលរដ្ឋខ្មែរក្នុងការជ្រើសរើសអ្នកដឹកនាំខ្លួនតាម គោលការណ៍ប្រជាធិបតេយ្យ ដូចមានចែងក្នុងកិច្ចព្រមព្រៀង។ ជាងនេះក៏បានទទូចដល់អន្តរជាតិមិនត្រូវទទួលស្គាល់នូវរាជ រដ្ឋាភិបាលណាដែលកើតឡើងពីការបោះឆ្នោតពោរពេញដោយភាពមិនប្រក្រតី និងពុំមានការដោះស្រាយបញ្ហាផ្ទុយពីឆន្ទៈម្ចាស់ឆ្នោត។
តាមការគណនា ឬបែងចែកចំនួនអាសនៈសភាអាណត្តិទី៥ ក្រៅផ្លូវការរបស់គណបក្សប្រជាជនកម្ពុជា និងអង្គការមិនមែនរដ្ឋាភិបាលមួយចំនួន មានអង្គការខុមហ្វ្រែល (Comfrel) ជាដើម បង្ហាញថា គណបក្សប្រជាជនកម្ពុជា ទទួលបានចំនួន ៦៨ ឬ ៦៧អាសនៈ និងគណបក្សសង្គ្រោះជាតិ ទទួលបាន ៥៥ ឬ ៥៦អាសនៈនៅក្នុងរដ្ឋសភា។ ប៉ុន្តែ លោក កឹម សុខា អះអាងថា គណបក្សសង្គ្រោះជាតិ អាចទទួលបានអាសនៈចំនួន ៦៣ ក្នុងរដ្ឋសភា។ លោកថ្លែងថា ការដឹកនាំមហាបាតុកម្មប្រឆាំងលទ្ធផលបោះឆ្នោតរបស់ប្រជាពលរដ្ឋខ្មែរ អាចជាជម្រើសចុងក្រោយ ប្រសិនបើភាពមិនប្រក្រតីកើតមានក្នុងពេលបោះឆ្នោត មិនត្រូវបានដោះស្រាយឲ្យបានត្រឹមត្រូវទេនោះ៕
ចុចមើលលទ្ធផលបណ្ដោះអាសន្នទាំង២៤ខេត្តក្រុង
0 comments:
Post a Comment