ដោយ សេក បណ្ឌិត
2013-08-02
RFA2013-08-02
ស្ដាប់ ឬ ទាញយកសំឡេង 
លោកនាយករដ្ឋមន្ត្រី ហ៊ុន សែន បង្ហាញម្រាមដៃដែលប្រឡាក់ទឹកថ្នាំ នៅក្រោយពេលបោះឆ្នោតនៅឯមណ្ឌលមួយកន្លែងក្នុងស្រុកតាខ្មៅខេត្ត កណ្ដាល នាថ្ងៃ២៧ កក្កដា ២០០៨។
AFP Photo
លោកនាយករដ្ឋមន្ត្រី ហ៊ុន សែន មានប្រសាសន៍ពីខេត្តកណ្ដាល នៅថ្ងៃសុក្រ ទី២ សីហា ថា សូមឲ្យប្រជាពលរដ្ឋពិចារណាមុនចូលរួមធ្វើបាតុកម្មប្រឆាំងនឹងលទ្ធផល បោះឆ្នោត ដែលគណៈកម្មាធិការជាតិរៀបចំការបោះឆ្នោតប្រកាសនៅពេលខាងមុខ។
លោកមានប្រសាសន៍នេះ សំដៅជាពិសេសដល់អ្នកភ្នំពេញ ដែលគួរគិតគូរពីបញ្ហាចូលរួមធ្វើបាតុកម្មនេះមុនគេ ពីព្រោះការចូលរួមនេះនឹងផ្តល់ឱកាសដល់ក្រុមចោរកម្ម និងខាតប្រយោជន៍ដល់ការរកស៊ីប្រចាំថ្ងៃទៀតផង។ លោកបានបង្ហើបពីលទ្ធភាពកើតមានបាតុកម្ម ចេញពីអ្នកដែលគាំទ្រលទ្ធផលបោះឆ្នោតប្រឆាំងជាមួយបាតុកម្មរបស់អ្នក បដិសេធន៍លទ្ធផលបោះឆ្នោត។
ការប្រកាសរបស់ លោក ហ៊ុន សែន បែបនេះក្រោយពីមេដឹកនាំគណបក្សសង្គ្រោះជាតិ ប្រកាសមិនទទួលស្គាល់លទ្ធផលបោះឆ្នោត ដោយសារគណបក្សនេះរកឃើញមានភាពប្រក្រតីជាច្រើនករណីកើតឡើងនៅថ្ងៃ បោះឆ្នោត ហើយថា បើពុំមានការដោះស្រាយណាមួយដែលធានានូវភាពត្រឹមត្រូវ យុត្តិធម៌ ដែលអាចទទួលយកបាននោះទេ នឹងមានការតវ៉ា ឬមហាបាតុកម្មទ្រង់ទ្រាយធំ ដើម្បីប្រឆាំងនឹងភាពមិនប្រក្រតី ឬការលួចបន្លំសន្លឹកឆ្នោត។
អនុប្រធានគណបក្សសង្គ្រោះជាតិ លោក កឹម សុខា នៅថ្ងៃសុក្រ ទី២ សីហា បានប្រតិកម្មទៅនឹងការអំពាវនាវរបស់ លោក ហ៊ុន សែន នោះ។
ទាក់ទងបញ្ហានេះ មន្ត្រីសង្គមស៊ីវិល បានសម្ដែងក្តីព្រួយបារម្ភចំពោះស្ថានការណ៍ក្រោយការបោះឆ្នោត ដោយខ្លាចកើតមានភាពចលាចល ឬអំពើហិង្សាណាមួយ ដែលពិបាកនឹងគ្រប់គ្រងស្ថានការណ៍នោះបាន បើទោះជាមានការអះអាងពី លោក ហ៊ុន សែន យ៉ាងណាក៏ដោយចុះ។
លោកបណ្ឌិត ហង្ស ពុទ្ធា មានប្រសាសន៍ថា បើសិនជាមានកំសួលនៃការងើបឡើងពីមជ្ឈដ្ឋាននានាក្នុងប្រទេស ដើម្បីប្រឆាំងនឹងភាពមិនប្រក្រតីនៃលទ្ធផលឆ្នោត ហើយបើមានមួយក្រុមទៀតប្រឆាំងតប ដោយមានអ្នកនយោបាយឈរនៅពីក្រោយខ្នងនោះ អាចនឹងធ្វើឲ្យស្ថានការណ៍នយោបាយកាន់តែតានតឹង និងអាចមានភាពច្របូកច្របល់មួយក្នុងប្រទេស។
ប៉ុន្តែ ទោះយ៉ាងណា លោកថា សារនយោបាយខ្លះរបស់មេដឹកនាំ គ្រាន់តែជាការគំរាមគ្នាទៅវិញទៅមក ដើម្បីយកប្រៀបលើការចរចាក្នុងការដោះស្រាយជម្លោះប៉ុណ្ណោះ។
នៅថ្ងៃសុក្រ ទី២ សីហា លោក ហ៊ុន សែន ក៏បានបញ្ជាក់ជាថ្មីថា លោកពុំបានគាំទ្រ ឬស្នើឲ្យបង្កើតគណៈកម្មការឯករាជ្យថ្មីណាមួយ ដើម្បីស៊ើបអង្កេតទៅលើភាពមិនប្រក្រតីក្នុងថ្ងៃបោះឆ្នោត កាលពីថ្ងៃទី២៨ កក្កដា នោះ ក្រៅពីអ្វីដែលមានស្រាប់ហើយ បានចែងនៅក្នុងច្បាប់ ហើយបើសិនជាមានការបង្កើតក្រុមស៊ើបអង្កេតណាមួយនោះ ត្រូវតែស្ថិតនៅក្រោមឆ័ត្រ គ.ជ.ប ឬ គ.ជ.ប ជាអ្នកដឹកនាំ។
ទោះយ៉ាងណាក្តី ស្របពេលគ្នានេះដែរ លោក ហ៊ុន សែន ក៏បានអំពាវនាវឲ្យពលរដ្ឋផ្អាកនិយាយពីការឈ្នះចាញ់របស់បក្សនយោបាយ ណាមួយ ហើយក៏កុំឲ្យមានការប្រកាន់ពណ៌សម្បុរគណបក្ស ដែលនាំឲ្យឈានទៅដល់ការបែកបាក់ក្នុងគ្រួសារក្នុងសហគមន៍ រហូតដល់ជាតិទាំងមូលនោះ៕
0 comments:
Post a Comment